sham-e-mazar thi na koi sogwar tha

sham-e-mazār thī na koī sogvār thā

tum jis pe ro rahe the ye kis kā mazār thā

taḌpūñgā umr-bhar dil-e-marhūm ke liye

kam-baḳht nā-murād laḌakpan kā yaar thā

saudā-e-ishq aur hai vahshat kuchh aur shai

majnūñ kā koī dost fasāna-nigār thā

jaadū hai yā tilism tumhārī zabān meñ

tum jhuuT kah rahe the mujhe e'tibār thā

kyā kyā hamāre sajde kī rusvā.iyāñ huiiñ

naqsh-e-qadam kisī kā sar-e-rahguzār thā

is vaqt tak to vaz.a meñ aayā nahīñ hai farq

terā karam sharīk jo parvardigār thā

sham-e-mazar thi na koi sogwar tha

tum jis pe ro rahe the ye kis ka mazar tha

taDpunga umr-bhar dil-e-marhum ke liye

kam-baKHt na-murad laDakpan ka yar tha

sauda-e-ishq aur hai wahshat kuchh aur shai

majnun ka koi dost fasana-nigar tha

jadu hai ya tilism tumhaari zaban mein

tum jhuT kah rahe the mujhe e'tibar tha

kya kya hamare sajde ki ruswaiyan huin

naqsh-e-qadam kisi ka sar-e-rahguzar tha

is waqt tak to waza mein aaya nahin hai farq

tera karam sharik jo parwardigar tha