shamim-e-zulf-e-muambar jo ru-e-yar se lun

shamīm-e-zulf-e-muambar jo rū-e-yār se luuñ

to phir ḳhatā hai mirī mushk gar tatār se luuñ

qadam rakhe mire siine pe aa ke gar vo nigār

hinā kā kaam maiñ ḳhūn-e-dil-fiġhār se luuñ

agar mile tire hāthoñ se ai junūñ fursat

qisās-e-ābla-pā.ī maiñ nok-e-ḳhār se luuñ

mire huzūr ye loTe hai terī chhātī par

jo pahuñche haath to badlā guloñ ke haar se luuñ

dilā baje kahīñ ghaḌiyāl tā maiñ ghaḌiyoñ kā

hisāb us shab-e-hijr-e-siyāhkār se luuñ

'ajab hai sair kisī din to saath baaġh meñ chal

kahāñ talak maiñ qadam ijz-o-inkisār se luuñ

paTā-paTī kā mire paas gar na ho ḳhema

to yaar tere liye abr-e-nau bahār se luuñ

jo mai-kashī kā irāda ho kuchh tire dil meñ

chaman meñ sāġhar-e-gul dast-e-shāḳh-sār se luuñ

agar surāhi-e-ġhuncha meñ ho na bāda-e-surḳh

to shīsha-e-mai-e-ḳhas sarv-e-jūī-bār se luuñ

na hove mutrib-e-naġhma-sarā to is kā kaam

qasam hai mujh ko tirī andalīb-e-zār se luuñ

lage na haath koī gar rabāb-o-chañg-navāz

to apne dosh pe rakh biin ko maiñ taar se luuñ

ye jī meñ ho ki na dekhe koī to parde ko

kanār-e-āb-e-ravāñ chādar ābshār se luuñ

balā.eñ lene se mere agar ḳhushī ho tirī

balā.eñ mehr se iḳhlās se pyaar se luuñ

gar us pe bhī gul-e-āriz kā tū na de bosa

to phir maiñ jabr karūñ apne iḳhtiyār se luuñ

'nasīr' madarsa-e-ishq meñ mutavval kā

sabaq na kyūñki maiñ zulf-e-darāz-e-yār se luuñ

shamim-e-zulf-e-muambar jo ru-e-yar se lun

to phir KHata hai meri mushk gar tatar se lun

qadam rakhe mere sine pe aa ke gar wo nigar

hina ka kaam main KHun-e-dil-fighaar se lun

agar mile tere hathon se ai junun fursat

qisas-e-abla-pai main nok-e-KHar se lun

mere huzur ye loTe hai teri chhati par

jo pahunche hath to badla gulon ke haar se lun

dila baje kahin ghaDiyal ta main ghaDiyon ka

hisab us shab-e-hijr-e-siyahkar se lun

'ajab hai sair kisi din to sath bagh mein chal

kahan talak main qadam ijz-o-inkisar se lun

paTa-paTi ka mere pas gar na ho KHema

to yar tere liye abr-e-nau bahaar se lun

jo mai-kashi ka irada ho kuchh tere dil mein

chaman mein saghar-e-gul dast-e-shaKH-sar se lun

agar surahi-e-ghuncha mein ho na baada-e-surKH

to shisha-e-mai-e-KHas sarw-e-jui-bar se lun

na howe mutrib-e-naghma-sara to is ka kaam

qasam hai mujh ko teri andalib-e-zar se lun

lage na hath koi gar rabab-o-chang-nawaz

to apne dosh pe rakh bin ko main tar se lun

ye ji mein ho ki na dekhe koi to parde ko

kanar-e-ab-e-rawan chadar aabshaar se lun

balaen lene se mere agar KHushi ho teri

balaen mehr se iKHlas se pyar se lun

gar us pe bhi gul-e-ariz ka tu na de bosa

to phir main jabr karun apne iKHtiyar se lun

'nasir' madarsa-e-ishq mein mutawwal ka

sabaq na kyunki main zulf-e-daraaz-e-yar se lun