sharar-e-sang jo is shor-o-shar se niklega

sharār-e-sañg jo is shor-o-shar se niklegā

jalūs-e-lāla-o-nasrīñ kidhar se niklegā

maiñ jāntā huuñ ki us kī ḳhabar na aa.egī

tanāzur us kā magar har ḳhabar se niklegā

sabhī asiir hue apnī apnī sub.hoñ ke

vo koī hogā jo qaid-e-sahar se niklegā

kisī ko apne sivā kuchh nazar nahīñ aatā

jo dīda-var hai tilism-e-nazar se niklegā

jalāl-e-husn dikhā mere māhtāb-e-jamāl

tū raushnī hai shaboñ ke asar se niklegā

shaboñ ko jāgte ho jis ke ḳhvāb meñ 'akbar'

vo shāhkār kamāl-e-hunar se niklegā

sharar-e-sang jo is shor-o-shar se niklega

jalus-e-lala-o-nasrin kidhar se niklega

main jaanta hun ki us ki KHabar na aaegi

tanazur us ka magar har KHabar se niklega

sabhi asir hue apni apni subhon ke

wo koi hoga jo qaid-e-sahar se niklega

kisi ko apne siwa kuchh nazar nahin aata

jo dida-war hai tilism-e-nazar se niklega

jalal-e-husn dikha mere mahtab-e-jamal

tu raushni hai shabon ke asar se niklega

shabon ko jagte ho jis ke KHwab mein 'akbar'

wo shahkar kamal-e-hunar se niklega