shauq-e-surur sham-e-gham apne siwa kisi ka hai

shauq-e-surūr shām-e-ġham apne sivā kisī kā hai

jām-o-subū kisī ke haiñ kaif-o-nasha kisī kā hai

qurb-e-vajūd ḳhaak hai koī gila to chāhiye

koī gila rahā nahīñ ham se gila kisī kā hai

shām-e-ḳhayāl-e-jāñ ḳhalā māhaul-e-dostāñ ḳhalā

vā'da huā kisī se hai vā'da vafā kisī kā hai

ḳhud ko pahuñch ke dekhiye kyā na paḌegā biich meñ

goyā qabā hai aap kī band-e-qabā kisī kī hai

sehr-e-asā-e-sāmrī ḳhauf-e-ḳhudā-e-rāmsīs

ya.anī asā kisī kā hai ya.anī ḳhudā kisī kā hai

kis ke ḳhudā kā zikr ho kis ke ḳhudā se kaam ho

dil meñ duā kisī se hai harf-e-duā kisī kā hai

shauq-e-surur sham-e-gham apne siwa kisi ka hai

jam-o-subu kisi ke hain kaif-o-nasha kisi ka hai

qurb-e-wajud KHak hai koi gila to chahiye

koi gila raha nahin hum se gila kisi ka hai

sham-e-KHayal-e-jaan KHala mahaul-e-dostan KHala

wa'da hua kisi se hai wa'da wafa kisi ka hai

KHud ko pahunch ke dekhiye kya na paDega bich mein

goya qaba hai aap ki band-e-qaba kisi ki hai

sehr-e-asa-e-samri KHauf-e-KHuda-e-ramsis

yani asa kisi ka hai yani KHuda kisi ka hai

kis ke KHuda ka zikr ho kis ke KHuda se kaam ho

dil mein dua kisi se hai harf-e-dua kisi ka hai