shauq ke hathon ai dil-e-muztar kya hona hai kya hoga

shauq ke hāthoñ ai dil-e-muztar kyā honā hai kyā hogā

ishq to rusvā ho hī chukā hai husn bhī kyā rusvā hogā

husn kī bazm-e-ḳhās meñ jā kar is se ziyāda kyā hogā

koī nayā paimāñ bāñdheñge koī nayā va.ada hogā

chāragarī sar āñkhoñ par is chāragarī se kyā hogā

dard ki apnī aap davā hai tum se kyā achchhā hogā

vā.iz-e-sāda-lauh se kah do chhoḌe uqbā kī bāteñ

is duniyā meñ kyā rakkhā hai is duniyā meñ kyā hogā

tum bhī 'majāz' insān ho āḳhir laakh chhupāo ishq apnā

ye bhed magar khul jā.egā ye raaz magar ifshā hogā

shauq ke hathon ai dil-e-muztar kya hona hai kya hoga

ishq to ruswa ho hi chuka hai husn bhi kya ruswa hoga

husn ki bazm-e-KHas mein ja kar is se ziyaada kya hoga

koi naya paiman bandhenge koi naya wada hoga

chaaragari sar aankhon par is chaaragari se kya hoga

dard ki apni aap dawa hai tum se kya achchha hoga

waiz-e-sada-lauh se kah do chhoDe uqba ki baaten

is duniya mein kya rakkha hai is duniya mein kya hoga

tum bhi 'majaz' insan ho aaKHir lakh chhupao ishq apna

ye bhed magar khul jaega ye raaz magar ifsha hoga