shikast-e-KHurdgi ke baad hausla nahin hua

shikast-e-ḳhurdgī ke baad hausla nahīñ huā

jo chūkā pahlā vaar hī to dūsrā nahīñ huā

kahā huā sunā huā likhā huā nahīñ huā

hamāre haq meñ to koī bhī faisla nahīñ huā

qadam saqīl ho ga.e tavīl raah ho ga.ī

malāl thā kamāl par visāl thā nahīñ huā

sukūt-e-lab kā vo sabab haiñ siskiyāñ vo hichkiyāñ

nigāh-e-ishq se faro vo hādisa nahīñ huā

tamām dil ke pārche bikhar chuke zamīn par

hisāb rakhne vaale kā muhāsba nahīñ huā

palaT ga.e tamāsh-bīñ ga.ī vo sho.abada-garī

thī guñg vo zabān jab kahā huā nahīñ huā

huī buland ik sadā ki ab karo vo faisla

nigāh-e-nāz-yāfta vo dūsrā nahīñ huā

tumhāre naqsh-e-pā pe maiñ jo chal rahā huuñ der se

maiñ ḳhatm ho rahā to huuñ pa rāsta nahīñ huā

shikast-e-KHurdgi ke baad hausla nahin hua

jo chuka pahla war hi to dusra nahin hua

kaha hua suna hua likha hua nahin hua

hamare haq mein to koi bhi faisla nahin hua

qadam saqil ho gae tawil rah ho gai

malal tha kamal par visal tha nahin hua

sukut-e-lab ka wo sabab hain siskiyan wo hichkiyan

nigah-e-ishq se faro wo hadisa nahin hua

tamam dil ke parche bikhar chuke zamin par

hisab rakhne wale ka muhasba nahin hua

palaT gae tamash-bin gai wo shoabada-gari

thi gung wo zaban jab kaha hua nahin hua

hui buland ek sada ki ab karo wo faisla

nigah-e-naz-yafta wo dusra nahin hua

tumhaare naqsh-e-pa pe main jo chal raha hun der se

main KHatm ho raha to hun pa rasta nahin hua