shikast-e-zindagi waise bhi maut hi hai na

shikast-e-zindagī vaise bhī maut hī hai nā

to sach batā ye mulāqāt āḳhirī hai nā

kahā nahīñ thā mirā jism aur bhar yārab

so ab ye ḳhaak tire paas bach ga.ī hai nā

tū mere haal se anjān kab hai ai duniyā

jo baat kah nahīñ paayā samajh rahī hai nā

isī liye hameñ ehsās-e-jurm hai shāyad

abhī hamārī mohabbat na.ī na.ī hai nā

ye kor-chashm ujāloñ se ishq karte haiñ

jo ghar jalā ke bhī kahte haiñ raushnī hai nā

maiñ ḳhud bhī yaar tujhe bhūlne ke haq meñ huuñ

magar jo biich meñ kam-baḳht shā.erī hai nā

maiñ jān-būjh ke aayā thā teġh aur tire biich

miyāñ nibhānī to paḌtī hai dostī hai nā

shikast-e-zindagi waise bhi maut hi hai na

to sach bata ye mulaqat aaKHiri hai na

kaha nahin tha mera jism aur bhar yarab

so ab ye KHak tere pas bach gai hai na

tu mere haal se anjaan kab hai ai duniya

jo baat kah nahin paya samajh rahi hai na

isi liye hamein ehsas-e-jurm hai shayad

abhi hamari mohabbat nai nai hai na

ye kor-chashm ujalon se ishq karte hain

jo ghar jala ke bhi kahte hain raushni hai na

main KHud bhi yar tujhe bhulne ke haq mein hun

magar jo bich mein kam-baKHt shaeri hai na

main jaan-bujh ke aaya tha tegh aur tere bich

miyan nibhani to paDti hai dosti hai na