shikasta-pa hi chalenge shikasta-pa ki taraf

shikasta-pā hī chaleñge shikasta-pā kī taraf

so ham palaTne lage haiñ tirī sadā kī taraf

jinheñ sañvarnā ho sab us ke saath ho jaa.eñ

bhaTakne vaale chaleñ mere naqsh-e-pā kī taraf

ḳhamoshī khīñch ke laa.ī mujhe vujūd talak

vujūd khīñch ke laayā hai mujh ko lā kī taraf

maiñ chīḳhtā rahā tanhā savāl kartā rahā

hazār log khaḌe the magar ḳhudā kī taraf

vo apnī rau meñ magan hai ham apne dhyān meñ gum

havā hamārī taraf hai na ham havā kī taraf

vo mujh ko paar lagāne kī zid pe aTkā hai

aur hañs ke dekh rahā huuñ maiñ nā-ḳhudā kī taraf

maiñ jangaloñ kī taraf se sadā lagātā thā

ḳhizāñ kī rut meñ bahāroñ ke devtā kī taraf

shikasta-pa hi chalenge shikasta-pa ki taraf

so hum palaTne lage hain teri sada ki taraf

jinhen sanwarna ho sab us ke sath ho jaen

bhaTakne wale chalen mere naqsh-e-pa ki taraf

KHamoshi khinch ke lai mujhe wujud talak

wujud khinch ke laya hai mujh ko la ki taraf

main chiKHta raha tanha sawal karta raha

hazar log khaDe the magar KHuda ki taraf

wo apni rau mein magan hai hum apne dhyan mein gum

hawa hamari taraf hai na hum hawa ki taraf

wo mujh ko par lagane ki zid pe aTka hai

aur hans ke dekh raha hun main na-KHuda ki taraf

main jangalon ki taraf se sada lagata tha

KHizan ki rut mein bahaaron ke dewta ki taraf