shoKHi ne teri lutf na rakkha hijab mein

shoḳhī ne terī lutf na rakkhā hijāb meñ

jalve ne tere aag lagā.ī naqāb meñ

vo qatra huuñ ki mauja-e-dariyā meñ gum huā

vo saaya huuñ ki mahv huā āftāb meñ

us saut-e-jāñ-navāz kā saanī banā nahīñ

kyā DhūñDte ho barbat-o-ūd-o-rabāb meñ

pūchhī thī ham ne vaj.h-e-mulāqāt-e-mudda.ī

ik umr ho ga.ī unheñ fikr-e-javāb meñ

laḌtī na jaa.e aañkh jo saaqī se 'sheftā'

ham ko to ḳhaak lutf na aa.e sharāb meñ

shoKHi ne teri lutf na rakkha hijab mein

jalwe ne tere aag lagai naqab mein

wo qatra hun ki mauja-e-dariya mein gum hua

wo saya hun ki mahw hua aaftab mein

us saut-e-jaan-nawaz ka sani bana nahin

kya DhunDte ho barbat-o-ud-o-rabab mein

puchhi thi hum ne wajh-e-mulaqat-e-muddai

ek umr ho gai unhen fikr-e-jawab mein

laDti na jae aankh jo saqi se 'shefta'

hum ko to KHak lutf na aae sharab mein