shukr hai aap aa gae aaj ka din to Tal gaya

shukr hai aap aa ga.e aaj kā din to Tal gayā

thoḌī sī baat ho ga.ī thoḌā sā dil bahal gayā

chashm-ba-chashm guftugū shahr-ba-shahr kū-ba-kū

sīna-ba-sīna rāz-e-dil duur talak nikal gayā

sho.ala numū-pazīr thā us kī ridā-e-sard meñ

shoḳh havā thī be-ḳhabar barf se haath jal gayā

shor hai be-dilī kā shor dhyān se merī baat sun

terā ḳhayāl-e-dil-sitāñ dil se mire nikal gayā

saa.e jhulas ke rah ga.e vaqt kī tez dhuup meñ

merā bhī rañg uḌ gayā terā bhī ruup Dhal gayā

vaise to kuchh nahīñ huā dekh ke us kī ik jhalak

paañv se khiñch ga.ī zamīñ haath se dil phisal gayā

chāragaroñ ke darmiyāñ us kī kamī rahī magar

shām-e-firāq-e-yār kā yaad se kaam chal gayā

jaadū tirī nigāh kā aaj na mujh pe chal sakā

aaj tirā ḳhayāl bhī kaise kahūñ ki khal gayā

shukr hai aap aa gae aaj ka din to Tal gaya

thoDi si baat ho gai thoDa sa dil bahal gaya

chashm-ba-chashm guftugu shahr-ba-shahr ku-ba-ku

sina-ba-sina raaz-e-dil dur talak nikal gaya

shoala numu-pazir tha us ki rida-e-sard mein

shoKH hawa thi be-KHabar barf se hath jal gaya

shor hai be-dili ka shor dhyan se meri baat sun

tera KHayal-e-dil-sitan dil se mere nikal gaya

sae jhulas ke rah gae waqt ki tez dhup mein

mera bhi rang uD gaya tera bhi rup Dhal gaya

waise to kuchh nahin hua dekh ke us ki ek jhalak

panw se khinch gai zamin hath se dil phisal gaya

chaaragaron ke darmiyan us ki kami rahi magar

sham-e-firaq-e-yar ka yaad se kaam chal gaya

jadu teri nigah ka aaj na mujh pe chal saka

aaj tera KHayal bhi kaise kahun ki khal gaya