sine ka ab tak hai zaKHm aala miyan

siine kā ab tak hai zaḳhm aalā miyāñ

hai anī mizhgāñ kī yā bhālā miyāñ

kis zamāne kī ye dushman thī mirī

is mohabbat kā ho muñh kaalā miyāñ

ishq meñ tere luTe sab durr-e-ashk

aisī var-ḳharchī ne ghar ghālā miyāñ

jo bisāt apnī meñ thā hosh-o-ḳhirad

jhokā jholī meñ tire laalā miyāñ

ishq ke zevar ko aañsū mat kaho

motiyoñ kī hai ye gul-mālā miyāñ

khol paT ghuñghaT kā dikhlāyā jamāl

mere taale kā khulā taalā miyāñ

sarv-e-bālā ko tire to dekh kar

ho ga.ī duniyā tah-o-bālā miyāñ

nekī merī aur badī apnī ko jaan

sab badī ko apnī to Dhālā miyāñ

Tālā, baalā 'azfarī' ko de ga.e

kaan kā apne dikhā baalā miyāñ

sine ka ab tak hai zaKHm aala miyan

hai ani mizhgan ki ya bhaala miyan

kis zamane ki ye dushman thi meri

is mohabbat ka ho munh kala miyan

ishq mein tere luTe sab durr-e-ashk

aisi war-KHarchi ne ghar ghaala miyan

jo bisat apni mein tha hosh-o-KHirad

jhoka jholi mein tere lala miyan

ishq ke zewar ko aansu mat kaho

motiyon ki hai ye gul-mala miyan

khol paT ghunghaT ka dikhlaya jamal

mere tale ka khula tala miyan

sarw-e-baala ko tere to dekh kar

ho gai duniya tah-o-baala miyan

neki meri aur badi apni ko jaan

sab badi ko apni to Dhaala miyan

Tala, baala 'azfari' ko de gae

kan ka apne dikha baala miyan