sipurd-e-ah na karte to aur kya karte

sipurd-e-āh na karte to aur kyā karte

ye dil tabāh na karte to aur kyā karte

ġhamoñ se shaġhl-e-rifāqat to ḳhair mushkil thā

magar nibāh na karte to aur kyā karte

tilism-e-jannat-e-ādam thā raat kā manzar

jo ham gunāh na karte to aur kyā karte

ham apne qalb-e-munavvar ko ai shab-e-ehsās

charāġh-e-rāh na karte to aur kyā karte

ma.āl-e-husn-e-nazar par nazar na thī jin kī

guloñ kī chaah na karte to aur kyā karte

shab-e-firāq meñ ham qismat-e-ġhazal terā

varaq syaah na karte to aur kyā karte

sharīk-e-bazm 'muazzam' the ham-navā tere

jo vaah vaah na karte to aur kyā karte

sipurd-e-ah na karte to aur kya karte

ye dil tabah na karte to aur kya karte

ghamon se shaghl-e-rifaqat to KHair mushkil tha

magar nibah na karte to aur kya karte

tilism-e-jannat-e-adam tha raat ka manzar

jo hum gunah na karte to aur kya karte

hum apne qalb-e-munawwar ko ai shab-e-ehsas

charagh-e-rah na karte to aur kya karte

maal-e-husn-e-nazar par nazar na thi jin ki

gulon ki chah na karte to aur kya karte

shab-e-firaq mein hum qismat-e-ghazal tera

waraq syah na karte to aur kya karte

sharik-e-bazm 'muazzam' the ham-nawa tere

jo wah wah na karte to aur kya karte