sisakti zindagi ko zindagani kaun deta hai

sisaktī zindagī ko zindagānī kaun detā hai

ḳhizāñ ke baad phir se rut-suhānī kaun detā hai

mirī āñkhoñ meñ sahrāoñ kā manzar dekhne vaalo

tah-e-sahrā ye dariyā ko ravānī kaun detā hai

nahīñ mujh se koī shikva-gila to sach batāo phir

mirī bātoñ ko rañg-e-bad-gumānī kaun detā hai

shah-e-kan.āñ kī chāhat meñ divānī misr kī malika

usī malika ko phir daur-e-javānī kaun detā hai

vahāñ par āb-o-gil se ruuh kī tashkīl hotī hai

yahāñ lā kar shu.ūr-e-zindagānī kaun detā hai

mahak uThtā har ik gosha-e-sher-o-suḳhan terā

'sadaf' hoñToñ ko tere gul-fishānī kaun detā hai

sisakti zindagi ko zindagani kaun deta hai

KHizan ke baad phir se rut-suhani kaun deta hai

meri aankhon mein sahraon ka manzar dekhne walo

tah-e-sahra ye dariya ko rawani kaun deta hai

nahin mujh se koi shikwa-gila to sach batao phir

meri baaton ko rang-e-bad-gumani kaun deta hai

shah-e-kanan ki chahat mein diwani misr ki malika

usi malika ko phir daur-e-jawani kaun deta hai

wahan par aab-o-gil se ruh ki tashkil hoti hai

yahan la kar shuur-e-zindagani kaun deta hai

mahak uThta har ek gosha-e-sher-o-suKHan tera

'sadaf' honTon ko tere gul-fishani kaun deta hai