sitam tumhaare main yun hi sahta nahin rahunga

sitam tumhāre maiñ yuuñ hī sahtā nahīñ rahūñgā

abhī to chup huuñ magar hamesha nahīñ rahūñgā

hai sharm mujh ko kaheñ mujhe log aadhā pāgal

kuchh ik baras meñ magar adhūrā nahīñ rahūñgā

safed zulfeñ jhukī kamar to zarūr hogī

magar na hogā ki dil se bachcha nahīñ rahūñgā

pighal rahī hai vo barf jis par rakhā gayā huuñ

yuuñ lag rahā hai maiñ rafta-rafta nahīñ rahūñgā

rasan bahut duur yuuñ hī mujh se rakhī ga.ī hai

ab apnī ḳhātir maiñ koī ḳhatra nahīñ rahūñgā

mujhe ḳhumārī ke bādaloñ se milegā saayā

maiñ hosh kī dhuup meñ ziyāda nahīñ rahūñgā

mire makāñ kī har ek dīvār kāñch kī hai

tabhī ye tai hai ki maiñ barahna nahīñ rahūñgā

sitam tumhaare main yun hi sahta nahin rahunga

abhi to chup hun magar hamesha nahin rahunga

hai sharm mujh ko kahen mujhe log aadha pagal

kuchh ek baras mein magar adhura nahin rahunga

safed zulfen jhuki kamar to zarur hogi

magar na hoga ki dil se bachcha nahin rahunga

pighal rahi hai wo barf jis par rakha gaya hun

yun lag raha hai main rafta-rafta nahin rahunga

rasan bahut dur yun hi mujh se rakhi gai hai

ab apni KHatir main koi KHatra nahin rahunga

mujhe KHumari ke baadalon se milega saya

main hosh ki dhup mein ziyaada nahin rahunga

mere makan ki har ek diwar kanch ki hai

tabhi ye tai hai ki main barahna nahin rahunga