sitamgaron ki itaat qubul karta hai

sitamgaroñ kī itā.at qubūl kartā hai

jadīd daur kā insāñ bhī bhuul kartā hai

tamām a.azā haiñ gumrāh ummatoñ kī tarah

bas ek dil hai jo kār-e-rasūl kartā hai

baḌī aziim duā se navāz kar saa.il

bahut haqīr sī qīmat vasūl kartā hai

kahāñ mahakte the pahle mire dar-o-dīvār

ye kaam us kī mohabbat kā phuul kartā hai

fasāna chheḌ ke guzre hue zamāne kā

vo apne saath mujhe bhī malūl kartā hai

hamāre bas meñ nahīñ hai mohabbatoñ kā nizām

vo ham se harf-e-shikāyat fuzūl kartā hai

mujhe to raqs bhī karne kā fan nahīñ aatā

zamāna kis liye merī nuqūl kartā hai

bichhaḌ gayā hai koī to koī milegā bhī

'riyāz' kis liye ḳhud ko malūl kartā hai

sitamgaron ki itaat qubul karta hai

jadid daur ka insan bhi bhul karta hai

tamam aaza hain gumrah ummaton ki tarah

bas ek dil hai jo kar-e-rasul karta hai

baDi azim dua se nawaz kar sail

bahut haqir si qimat wasul karta hai

kahan mahakte the pahle mere dar-o-diwar

ye kaam us ki mohabbat ka phul karta hai

fasana chheD ke guzre hue zamane ka

wo apne sath mujhe bhi malul karta hai

hamare bas mein nahin hai mohabbaton ka nizam

wo hum se harf-e-shikayat fuzul karta hai

mujhe to raqs bhi karne ka fan nahin aata

zamana kis liye meri nuqul karta hai

bichhaD gaya hai koi to koi milega bhi

'riyaz' kis liye KHud ko malul karta hai