junun tohmat-kash-e-taskin na ho gar shadmani ki

junūñ tohmat-kash-e-taskīñ na ho gar shādmānī kī

namak-pāsh-e-ḳharāsh-e-dil hai lazzat zindagānī kī

kashākash-hā-e-hastī se kare kyā sa.i-e-āzādī

hui zanjīr-e-mauj-e-āb ko fursat ravānī kī

pas-az-murdan bhī dīvāna ziyārat-gāh-e-tiflāñ hai

sharār-e-sañg ne turbat pe merī gul-fishānī kī

na khīñch ai sa.ī-e-dast-e-nā-rasā zulf-e-tamannā ko

pareshāñ-tar hai mū-e-ḳhāma se tadbīr maanī kī

kahāñ ham bhī rag-o-pai rakhte haiñ insāf bahattar hai

na khīñche tāqat-e-ḳhamyāza tohmat nā-tavānī kī

takalluf-bartaraf farhād aur itnī subukdastī

ḳhayāl āsāñ thā lekin ḳhvāb-e-ḳhusrav ne girānī kī

'asad' ko boriye meñ dhar ke phūñkā mauj-e-hastī ne

faqīrī meñ bhī baaqī hai sharārat naujavānī kī

junun tohmat-kash-e-taskin na ho gar shadmani ki

namak-pash-e-KHarash-e-dil hai lazzat zindagani ki

kashakash-ha-e-hasti se kare kya sai-e-azadi

hui zanjir-e-mauj-e-ab ko fursat rawani ki

pas-az-murdan bhi diwana ziyarat-gah-e-tiflan hai

sharar-e-sang ne turbat pe meri gul-fishani ki

na khinch ai sai-e-dast-e-na-rasa zulf-e-tamanna ko

pareshan-tar hai mu-e-KHama se tadbir mani ki

kahan hum bhi rag-o-pai rakhte hain insaf bahattar hai

na khinche taqat-e-KHamyaza tohmat na-tawani ki

takalluf-bartaraf farhad aur itni subukdasti

KHayal aasan tha lekin KHwab-e-KHusraw ne girani ki

'asad' ko boriye mein dhar ke phunka mauj-e-hasti ne

faqiri mein bhi baqi hai shararat naujawani ki