siyasi nafraton ki zad mein aaenge hamin kab tak

siyāsī nafratoñ kī zad meñ ā.eñge hamīñ kab tak

bhigo kar shaah rakkhegā lahū meñ āstīñ kab tak

ka.ī kankar vafā kī jhiil meñ maiñ pheñk aaya huuñ

ubhar kar sat.h pe ā.eñge dekheñ tah-nashīñ kab tak

bharam ke paañv kī zanjīr ko sach toḌ hī degā

kisī ke jhuuT par koī karegā bhī yaqīñ kab tak

rakhegā vaqt un ke rū-barū bhī aa.ina ik din

jahāñ ke aib hī dekhā kareñge nukta-chīñ kab tak

nigāhoñ se hī vo har shaḳhs ko kāfir banā degā

bachegī ye havas ke saa.e se rū-e-zamīñ kab tak

na jaane kab rihā is qaid se ham hoñge ai 'sāhil'

satā.eñge hamārī ziist ko ye kufr-o-dīñ kab tak

siyasi nafraton ki zad mein aaenge hamin kab tak

bhigo kar shah rakkhega lahu mein aastin kab tak

kai kankar wafa ki jhil mein main phenk aaya hun

ubhar kar sath pe aaenge dekhen tah-nashin kab tak

bharam ke panw ki zanjir ko sach toD hi dega

kisi ke jhuT par koi karega bhi yaqin kab tak

rakhega waqt un ke ru-baru bhi aaina ek din

jahan ke aib hi dekha karenge nukta-chin kab tak

nigahon se hi wo har shaKHs ko kafir bana dega

bachegi ye hawas ke sae se ru-e-zamin kab tak

na jaane kab riha is qaid se hum honge ai 'sahil'

sataenge hamari zist ko ye kufr-o-din kab tak