soch le tu bhi zara ruTh ke jaane wale

soch le tū bhī zarā ruuTh ke jaane vaale

uñgliyāñ ham pe uThā.eñge zamāne vaale

'ishq ke shahr meñ aanā hai to ye soch ke aa

rāste is meñ nahīñ lauT ke jaane vaale

tum mujhe bhuul ga.e maiñ bhī tumheñ bhuul gayā

aaj ḳhush hoñge bahut ham se zamāne vaale

shoḳh nazreñ bhī nahīñ lab pe tabassum bhī nahīñ

Dhang kyā ho ga.e vo dil ko lubhāne vaale

jaane kyā soch ke ro dete haiñ kis ko mā'lūm

turbat-e-ḳhvāb pe ye phuul chaḌhāne vaale

kitne sangīn maqāmoñ se guzarte hoñge

dil meñ ik sham' mohabbat kī jalāne vaale

haa.e kyoñ phuuT gayā merā muqaddar 'ash.har'

haa.e kyoñ ruuTh ga.e mujh ko manāne vaale

soch le tu bhi zara ruTh ke jaane wale

ungliyan hum pe uThaenge zamane wale

'ishq ke shahr mein aana hai to ye soch ke aa

raste is mein nahin lauT ke jaane wale

tum mujhe bhul gae main bhi tumhein bhul gaya

aaj KHush honge bahut hum se zamane wale

shoKH nazren bhi nahin lab pe tabassum bhi nahin

Dhang kya ho gae wo dil ko lubhane wale

jaane kya soch ke ro dete hain kis ko ma'lum

turbat-e-KHwab pe ye phul chaDhane wale

kitne sangin maqamon se guzarte honge

dil mein ek sham' mohabbat ki jalane wale

hae kyon phuT gaya mera muqaddar 'ashhar'

hae kyon ruTh gae mujh ko manane wale