sochta hun raat jo suraj tha daen hath mein

sochtā huuñ raat jo sūraj thā daa.eñ haath meñ

sub.h kaise Dhal gayā vo mere baa.eñ haath meñ

ham agar kuchh aur apne zehn-o-dil raushan kareñ

dosto ye māh-o-anjum jagmagā.eñ haath meñ

hal na ho paayā agar qaht-e-zamīñ kā mas.ala

ye bhī mumkin hai ki ham fasleñ ugā.eñ haath meñ

dasht-e-chashm-o-qalb meñ bhī jo nazar aatā nahīñ

aao ham tum ko vahī manzar dikhā.eñ haath meñ

jab hisār-e-ḳhauf se āzād ho jaatā hai dil

qaid ho jaatī haiñ tab saarī balā.eñ haath meñ

jab mirī sāñsoñ se ye māhaul yaḳh-basta huā

munjamid hone lagīñ jaltī havā.eñ haath meñ

shā.erī kī ye shab-e-tārīk Dhaltī hī nahīñ

'kaif' kab tak ham charāġh-e-fan jalā.eñ haath meñ

sochta hun raat jo suraj tha daen hath mein

subh kaise Dhal gaya wo mere baen hath mein

hum agar kuchh aur apne zehn-o-dil raushan karen

dosto ye mah-o-anjum jagmagaen hath mein

hal na ho paya agar qaht-e-zamin ka masala

ye bhi mumkin hai ki hum faslen ugaen hath mein

dasht-e-chashm-o-qalb mein bhi jo nazar aata nahin

aao hum tum ko wahi manzar dikhaen hath mein

jab hisar-e-KHauf se aazad ho jata hai dil

qaid ho jati hain tab sari balaen hath mein

jab meri sanson se ye mahaul yaKH-basta hua

munjamid hone lagin jalti hawaen hath mein

shaeri ki ye shab-e-tarik Dhalti hi nahin

'kaif' kab tak hum charagh-e-fan jalaen hath mein