soe hue jazbon ko jagana hi nahin tha

so.e hue jazboñ ko jagānā hī nahīñ thā

ai dil vo mohabbat kā zamāna hī nahīñ thā

mahke the charāġh aur dahak uTThī thiiñ kaliyāñ

go sab ko ḳhabar thī use aanā hī nahīñ thā

dīvār pe vā'doñ kī amar-bel chaḌhā dī

ruḳhsat ke liye aur bahāna hī nahīñ thā

uḌtī huī chingāriyāñ sone nahīñ detīñ

rūThe hue is ḳhat ko jalānā hī nahīñ thā

nīñdeñ bhī nazar band haiñ tā'bīr bhī qaidī

zindāñ meñ koī ḳhvāb sunānā hī nahīñ thā

paanī to hai kam naql-e-makānī hai ziyāda

ye shahr sarāboñ meñ basānā hī nahīñ thā

soe hue jazbon ko jagana hi nahin tha

ai dil wo mohabbat ka zamana hi nahin tha

mahke the charagh aur dahak uTThi thin kaliyan

go sab ko KHabar thi use aana hi nahin tha

diwar pe wa'don ki amar-bel chaDha di

ruKHsat ke liye aur bahana hi nahin tha

uDti hui chingariyan sone nahin detin

ruThe hue is KHat ko jalana hi nahin tha

ninden bhi nazar band hain ta'bir bhi qaidi

zindan mein koi KHwab sunana hi nahin tha

pani to hai kam naql-e-makani hai ziyaada

ye shahr sarabon mein basana hi nahin tha