sona tha jitna ahd-e-jawani mein so liye

sonā thā jitnā ahd-e-javānī meñ so liye

ab dhuup sar pe aa ga.ī hai aañkh kholiye

yaad aa gayā jo apnā garebāñ bahār meñ

dāman se muñh lapeT liyā aur ro liye

ab aur kyā kareñ tire tark-e-sitam ke ba.ad

ḳhud apne dil meñ aap hī nashtar chubho liye

parvāna-e-rihā.ī-e-ḳhāma to mil gayā

lekin huzūr ab dar-e-zindāñ bhī kholiye

apne liye ta.ayyun-e-manzil koī nahīñ

jo bhiiḌ jis taraf ko chalī saath ho liye

thī nāgavār-e-tab.a tujhe sādgi-e-ishq

le aaj ham ne palkoñ meñ motī piro liye

har ik ba-zom-e-ḳhvesh jahāñ ho suḳhan-shanās

behtar ye hai 'sabā' ki vahāñ kuchh na boliye

sona tha jitna ahd-e-jawani mein so liye

ab dhup sar pe aa gai hai aankh kholiye

yaad aa gaya jo apna gareban bahaar mein

daman se munh lapeT liya aur ro liye

ab aur kya karen tere tark-e-sitam ke baad

KHud apne dil mein aap hi nashtar chubho liye

parwana-e-rihai-e-KHama to mil gaya

lekin huzur ab dar-e-zindan bhi kholiye

apne liye tayyun-e-manzil koi nahin

jo bhiD jis taraf ko chali sath ho liye

thi nagawar-e-taba tujhe sadgi-e-ishq

le aaj hum ne palkon mein moti piro liye

har ek ba-zom-e-KHwesh jahan ho suKHan-shanas

behtar ye hai 'saba' ki wahan kuchh na boliye