subuk hun apni nigahon mein arz-e-haal ke baad

subuk huuñ apnī nigāhoñ meñ arz-e-hāl ke ba.ad

ki aabrū nahīñ rahtī kabhī savāl ke ba.ad

na pūchho dil ko huī haiñ aziyyateñ kyā kyā

kabhī savāl se pahle kabhī savāl ke ba.ad

zamīr kī vo musalsal malāmateñ tauba

milā hai dil ko sakūñ ashk-e-infi.āl ke ba.ad

qarār dil ko nahīñ thā qarār dil ko nahīñ

tire visāl se pahle tire visāl ke ba.ad

tire itaab sahe sabr se to lutf huā

tirā jamāl bhī dekhā tire jalāl ke ba.ad

zan-o-gumāñ se guzar kar tirā ḳhayāl aayā

koī ḳhayāl na aayā tire ḳhayāl ke ba.ad

maiñ dil to haar chukā jān-o-māl hāzir haiñ

'ḳhalish' ke paas hai kyā aur jān-o-māl ke ba.ad

subuk hun apni nigahon mein arz-e-haal ke baad

ki aabru nahin rahti kabhi sawal ke baad

na puchho dil ko hui hain aziyyaten kya kya

kabhi sawal se pahle kabhi sawal ke baad

zamir ki wo musalsal malamaten tauba

mila hai dil ko sakun ashk-e-infial ke baad

qarar dil ko nahin tha qarar dil ko nahin

tere visal se pahle tere visal ke baad

tere itab sahe sabr se to lutf hua

tera jamal bhi dekha tere jalal ke baad

zan-o-guman se guzar kar tera KHayal aaya

koi KHayal na aaya tere KHayal ke baad

main dil to haar chuka jaan-o-mal hazir hain

'KHalish' ke pas hai kya aur jaan-o-mal ke baad