subuk-raftar lamhon ki haden tartib deta hun

subuk-raftār lamhoñ kī hadeñ tartīb detā huuñ

sahar ke saañs gintā huuñ shabeñ tartīb detā huuñ

mire yāroñ kī fitrat meñ yazīdī vasf shāmil hai

vahī mujh ko miTāte haiñ jinheñ tartīb detā huuñ

ḳhizāñ ne ḳhushk pattoñ meñ sadā.eñ baañT rakkhī haiñ

maiñ un kī sarsarāhaT se dhuneñ tartīb detā huuñ

tujhe sochūñ to pahlū se sarak jaatā hai merā dil

so dil pe haath rakh kar dhaḌkaneñ tartīb detā huuñ

bikhar jaatā hai paspā ho ke jab lashkar irādoñ kā

na.ī quvvat se phir apnī safeñ tartīb detā huuñ

maiñ pahnātā huuñ lafzoñ ko ma'ānī kī qabā 'sāgar'

ġhazal kahtā huuñ un kī sūrateñ tartīb detā huuñ

subuk-raftar lamhon ki haden tartib deta hun

sahar ke sans ginta hun shaben tartib deta hun

mere yaron ki fitrat mein yazidi wasf shamil hai

wahi mujh ko miTate hain jinhen tartib deta hun

KHizan ne KHushk patton mein sadaen banT rakkhi hain

main un ki sarsarahaT se dhunen tartib deta hun

tujhe sochun to pahlu se sarak jata hai mera dil

so dil pe hath rakh kar dhaDkanen tartib deta hun

bikhar jata hai paspa ho ke jab lashkar iradon ka

nai quwwat se phir apni safen tartib deta hun

main pahnata hun lafzon ko ma'ani ki qaba 'sagar'

ghazal kahta hun un ki suraten tartib deta hun