suna rahe hain koi git raste mujhko

sunā rahe haiñ koī giit rāste mujh ko

ye kah rahe haiñ mire paañv kaan de mujh ko

adhūrī rakkhī hai tasvīr us ne duniyā kī

banā le puurī to likhne ko phir kahe mujh ko

koī to ishq kā parcham kahīñ buland kare

to aadmī bhī kabhī aadmī lage mujh ko

tamām umr sunī maiñ ne apne dil kī magar

maiñ chāhtī huuñ mirā dil kabhī sune mujh ko

jo dil ke siip meñ kuchh hasratoñ ke motī haiñ

tire uchhāle ye kankaḌ haiñ mil ga.e mujh ko

charāġh kah ke in āñkhoñ ko kyā kiyā tū ne

ki ab to rone meñ bhī Dar sā hī lage mujh ko

mire vajūd kā paudā kaho lagegā kahāñ

nishāt-o-ġham kī jaḌoñ meñ tumhīñ mile mujh ko

banāyā zaḳhm to pighlā ke mom bhī Daalā

har ek zaḳhm ye sūraj sā ab lage mujh ko

ġhazal ke saath zamāna to chal nahīñ saktā

nahīñ hai sāñcha koī jo ki Dhaal le mujh ko

suna rahe hain koi git raste mujh ko

ye kah rahe hain mere panw kan de mujh ko

adhuri rakkhi hai taswir us ne duniya ki

bana le puri to likhne ko phir kahe mujh ko

koi to ishq ka parcham kahin buland kare

to aadmi bhi kabhi aadmi lage mujh ko

tamam umr suni main ne apne dil ki magar

main chahti hun mera dil kabhi sune mujh ko

jo dil ke sip mein kuchh hasraton ke moti hain

tere uchhaale ye kankaD hain mil gae mujh ko

charagh kah ke in aankhon ko kya kiya tu ne

ki ab to rone mein bhi Dar sa hi lage mujh ko

mere wajud ka pauda kaho lagega kahan

nishat-o-gham ki jaDon mein tumhin mile mujh ko

banaya zaKHm to pighla ke mom bhi Dala

har ek zaKHm ye suraj sa ab lage mujh ko

ghazal ke sath zamana to chal nahin sakta

nahin hai sancha koi jo ki Dhaal le mujh ko