surat koi qarar ki din-raat mein nahin

sūrat koī qarār kī din-rāt meñ nahīñ

ye chiiz vo hai jo mire auqāt meñ nahīñ

kahte haiñ uzr ham ko mulāqāt meñ nahīñ

ham tujh se muttafiq magar ik baat meñ nahīñ

vo fasl kaun sī hai jo raas aa.egī hameñ

taskīñ bahār meñ nahīñ barsāt meñ nahīñ

uqbā kā kuchh to ai dil-e-nādāñ rahe ḳhayāl

kyā tujh ko vahm hai ki ajal ghaat meñ nahīñ

āzād qaid-o-band se haiñ aaj ahl-e-fan

pāband ya.anī koī kisī baat meñ nahīñ

jo jis ke jī meñ aa.e likhe aur chhāp de

kuchh farq sher aur ḳhurāfāt meñ nahīñ

parhez-gār bhī use hargiz na jāniye

'mahrūm' agarche ahl-e-ḳharābāt meñ nahīñ

surat koi qarar ki din-raat mein nahin

ye chiz wo hai jo mere auqat mein nahin

kahte hain uzr hum ko mulaqat mein nahin

hum tujh se muttafiq magar ek baat mein nahin

wo fasl kaun si hai jo ras aaegi hamein

taskin bahaar mein nahin barsat mein nahin

uqba ka kuchh to ai dil-e-nadan rahe KHayal

kya tujh ko wahm hai ki ajal ghat mein nahin

aazad qaid-o-band se hain aaj ahl-e-fan

paband yani koi kisi baat mein nahin

jo jis ke ji mein aae likhe aur chhap de

kuchh farq sher aur KHurafat mein nahin

parhez-gar bhi use hargiz na jaaniye

'mahrum' agarche ahl-e-KHarabaat mein nahin