taron wali raat ka aalam pine aur pilane se

tāroñ vaalī raat kā aalam piine aur pilāne se

saaqī ne mai khīñch ke rakh dī goyā daane daane se

tār-e-garebāñ siine vaale chāk-ba-dāman aa.e haiñ

ya.anī kuchh taqdīr na suljhī uljhī thī dīvāne se

raat nahīñ ye ziist kā din hai hosh meñ aa barbād na kar

sham.a faqat mehmān-e-sahar hai kaun kahe parvāne se

dair-o-haram se uThne vaale aa.e haiñ maiḳhāne meñ

is pe agar taqdīr uThā de jaa.eñ kahāñ maiḳhāne se

josh-e-junūñ sā rahbar ho to hosh kī manzil duur nahīñ

dīvāne ne raah banā dī bastī tak vīrāne se

saaqī ke andāz ko dekho be-ḳhud piine vāloñ meñ

miltī hai mai qismat se go baTtī hai paimāne se

zarf mirī qismat kā bharā hai aap nigāh-e-sāqī ne

paimāne ko ḳhum se milī aur ḳhum ko milī paimāne se

umr-e-do-roza 'kaifī' kī yuuñ kaT hī ga.ī yuuñ kaTnī thī

kaam rahā paimāne se aur saaqī ke maiḳhāne se

taron wali raat ka aalam pine aur pilane se

saqi ne mai khinch ke rakh di goya dane dane se

tar-e-gareban sine wale chaak-ba-daman aae hain

yani kuchh taqdir na suljhi uljhi thi diwane se

raat nahin ye zist ka din hai hosh mein aa barbaad na kar

shama faqat mehman-e-sahar hai kaun kahe parwane se

dair-o-haram se uThne wale aae hain maiKHane mein

is pe agar taqdir uTha de jaen kahan maiKHane se

josh-e-junun sa rahbar ho to hosh ki manzil dur nahin

diwane ne rah bana di basti tak virane se

saqi ke andaz ko dekho be-KHud pine walon mein

milti hai mai qismat se go baTti hai paimane se

zarf meri qismat ka bhara hai aap nigah-e-saqi ne

paimane ko KHum se mili aur KHum ko mili paimane se

umr-e-do-roza 'kaifi' ki yun kaT hi gai yun kaTni thi

kaam raha paimane se aur saqi ke maiKHane se