tai mujhse zindagi ka kahan fasla hua

tai mujh se zindagī kā kahāñ fāsla huā

hai merā ġham ke phuul se dāman bharā huā

hariyāliyoñ ke vāste āñkheñ taras ga.iiñ

har khet meñ milā hameñ patthar ugā huā

uḌtī huī patañg ke mānind maiñ bhī huuñ

mazbūt ek Dor se lekin bañdhā huā

har samt ehtijāj kī āvāz mar ga.ī

kis ḳhāmushī ke saath ye mahshar bapā huā

is shahr ko faqīr kī jab bad-duā lagī

bārish huī na phir koī manzar harā huā

dekhā hai us ke saath bhī chal kar bahut 'hasan'

lagtā hai vo hasīn agar ho rukā huā

tai mujh se zindagi ka kahan fasla hua

hai mera gham ke phul se daman bhara hua

hariyaliyon ke waste aankhen taras gain

har khet mein mila hamein patthar uga hua

uDti hui patang ke manind main bhi hun

mazbut ek Dor se lekin bandha hua

har samt ehtijaj ki aawaz mar gai

kis KHamushi ke sath ye mahshar bapa hua

is shahr ko faqir ki jab bad-dua lagi

barish hui na phir koi manzar hara hua

dekha hai us ke sath bhi chal kar bahut 'hasan'

lagta hai wo hasin agar ho ruka hua