talwar bano dard ke mare hue logo

talvār bano dard ke maare hue logo

yuuñ haar ke baiTho nahīñ haare hue logo

himmat ho to ta.abīreñ bhī kartī haiñ ināyat

āñkhoñ meñ chalo ḳhvāb sañvāre hue logo

tum miTTī ho miTTī ko hiqārat se na dekho

ai arsh-e-muallā se utāre hue logo

muhtāj usī dar ke haiñ hākim ki ġhanī hoñ

jaao na kahīñ haath pasāre hue logo

sahrā se chale aa bhī ga.e dār-o-rasan tak

honā thā jinheñ vo na hamāre hue logo

yāroñ ne 'anīs' apne nibāhī nahīñ yaarī

mīThe the jo dariyā vahī khāre hue logo

talwar bano dard ke mare hue logo

yun haar ke baiTho nahin haare hue logo

himmat ho to tabiren bhi karti hain inayat

aankhon mein chalo KHwab sanware hue logo

tum miTTi ho miTTi ko hiqarat se na dekho

ai arsh-e-mualla se utare hue logo

muhtaj usi dar ke hain hakim ki ghani hon

jao na kahin hath pasare hue logo

sahra se chale aa bhi gae dar-o-rasan tak

hona tha jinhen wo na hamare hue logo

yaron ne 'anis' apne nibahi nahin yari

miThe the jo dariya wahi khaare hue logo