تلوار کھینچتے ہوئے پایا گیا مجھے

تلوار کھینچتے ہوئے پایا گیا مجھے

قاتل بنا کے ہوش میں لایا گیا مجھے

میرا ہی خون تھا جو پلایا گیا مجھے

جب سیر ہو گیا تو بتایا گیا مجھے

کیا شہر تھا کہ رکتے ہی اک بھیڑ لگ گئی

فوراً ہی راستے سے ہٹایا گیا مجھے

اک دوسرے کو دیکھ نہ سکتے تھے راستے

دونوں کے درمیان بسایا گیا مجھے

ڈوبے ہوئے مکان کی چھت پر کھڑا تھا میں

منظر میں نقش آب دکھایا گیا مجھے

ساحل پہ لا کے راستہ اس پار ہو گیا

دریا میں ڈوبنے سے بچایا گیا مجھے

اک روز میری حد کا تعین کیا گیا

پھر ایک روز حد سے بڑھایا گیا مجھے