tamam abr pahaDon pe sar paTakte rahe

tamām abr pahāḌoñ pe sar paTakte rahe

ġharīb dahkāñ ke aañsū magar Tapakte rahe

tamām mausam-e-bārish isī tarah guzrā

chhateñ Tapaktī rahīñ aur makīñ sisakte rahe

nihārne ke liye jab na mil sakā manzar

ham apnī soḳhta-sāmāniyoñ ko takte rahe

makān ashkoñ ke sailāb meñ Thahar na sake

makīn palkoñ kī shāḳheñ pakaḌ laTakte rahe

vo ham pe barf kā tūfān ban ke TuuT paḌā

ham apne aap meñ sho.ala bane bhabhakte rahe

amiir logoñ kī bastī meñ koī dar na khulā

ġharīb log har ik dar pe sar paTakte rahe

'navāz' luqme pe luqma diyā hai ham ne magar

mohabbatoñ kī tilāvat meñ vo aTakte rahe

tamam abr pahaDon pe sar paTakte rahe

gharib dahkan ke aansu magar Tapakte rahe

tamam mausam-e-barish isi tarah guzra

chhaten Tapakti rahin aur makin sisakte rahe

nihaarne ke liye jab na mil saka manzar

hum apni soKHta-samaniyon ko takte rahe

makan ashkon ke sailab mein Thahar na sake

makin palkon ki shaKHen pakaD laTakte rahe

wo hum pe barf ka tufan ban ke TuT paDa

hum apne aap mein shoala bane bhabhakte rahe

amir logon ki basti mein koi dar na khula

gharib log har ek dar pe sar paTakte rahe

'nawaz' luqme pe luqma diya hai hum ne magar

mohabbaton ki tilawat mein wo aTakte rahe