tanhai ki aaghosh mein tha subh se pahle

tanhā.ī kī āġhosh meñ thā sub.h se pahle

miltī rahī ulfat kī sazā sub.h se pahle

shāyad mire lafzoñ pe taras aa.e use ab

rote hue māñgī hai duā sub.h se pahle

saaya bhī mirā kho gayā tārīki-e-shab meñ

zulmat kā asar aisā rahā sub.h se pahle

jab raat meñ so jaatī hai ye saarī ḳhudā.ī

detā hai mujhe kaun sadā sub.h se pahle

shāyad ki muqaddar meñ na ho kal kā ye sūraj

ho jaa.e har ik qarz adā sub.h se pahle

'shauqī' tujhe mil jā.eñge shaiḳh aur barahman

is shahr ke maiḳhāne meñ aa sub.h se pahle

tanhai ki aaghosh mein tha subh se pahle

milti rahi ulfat ki saza subh se pahle

shayad mere lafzon pe taras aae use ab

rote hue mangi hai dua subh se pahle

saya bhi mera kho gaya tariki-e-shab mein

zulmat ka asar aisa raha subh se pahle

jab raat mein so jati hai ye sari KHudai

deta hai mujhe kaun sada subh se pahle

shayad ki muqaddar mein na ho kal ka ye suraj

ho jae har ek qarz ada subh se pahle

'shauqi' tujhe mil jaenge shaiKH aur barahman

is shahr ke maiKHane mein aa subh se pahle