aatish-e-husn bhari hai tere ruKHsaron mein

ātish-e-husn bharī hai tere ruḳhsāroñ meñ

kaun muñh maare dahakte hue añgāroñ meñ

tālib-e-dīd ko jab diid kā mauqa na milā

lākhoñ sūrāḳh kiye yaar kī dīvāroñ meñ

aaj kyā tū ne ayādat kā kiyā hai va.ada

khalbalī aaj machī hai tere bīmāroñ meñ

saiñkaḌoñ botaleñ aur bīsiyoñ sāġhar TuuTe

hāthā-pā.ī jo zarā ho ga.ī mai-ḳhvāroñ meñ

ġhair se aaj huī nochā khasūTi terī

daaġh jo niile paḌe haiñ tere ruḳhsāroñ meñ

bād-e-abrū se shab-e-hijr ko kaaTā ham ne

ye bhī chaltā huā hathiyār hai hathiyāroñ meñ

kahīñ ho jaa.e use burda-faroshī meñ sazā

ġhair us but ko liye phirtā hai bāzāroñ meñ

ham ko bhī husn-e-malāhat kā maza chakkhvā do

ham bhī haiñ aap ke muddat se talab-gāroñ meñ

buum sāhab kā ajab rañg nirālā dekhā

yaar yāroñ meñ hai aġhyār hai aġhyāroñ meñ

aatish-e-husn bhari hai tere ruKHsaron mein

kaun munh mare dahakte hue angaron mein

talib-e-did ko jab did ka mauqa na mila

lakhon suraKH kiye yar ki diwaron mein

aaj kya tu ne ayaadat ka kiya hai wada

khalbali aaj machi hai tere bimaron mein

sainkaDon botalen aur bisiyon saghar TuTe

hatha-pai jo zara ho gai mai-KHwaron mein

ghair se aaj hui nocha khasuTi teri

dagh jo nile paDe hain tere ruKHsaron mein

baad-e-abru se shab-e-hijr ko kaTa hum ne

ye bhi chalta hua hathiyar hai hathiyaron mein

kahin ho jae use burda-faroshi mein saza

ghair us but ko liye phirta hai bazaron mein

hum ko bhi husn-e-malahat ka maza chakkhwa do

hum bhi hain aap ke muddat se talab-garon mein

bum sahab ka ajab rang nirala dekha

yar yaron mein hai aghyar hai aghyaron mein