arman mere dil ke nikalne nahin dete

armān mire dil ke nikalne nahīñ dete

vo daal mire ishq kī galne nahīñ dete

har roz kiyā karte haiñ vo ik nayā va.ada

ushshāq ko hāthoñ se nikalne nahīñ dete

rātoñ ko bhī ġhāza se chamaktā hai vo chehra

sūraj vo kabhī husn kā Dhalne nahīñ dete

har roz vo har ahd se phir jaate haiñ lekin

pahlī ke mire va.ade ko Talne nahīñ dete

ruḳhsār ke sho.ale hoñ ki hoñToñ kī tapish ho

parvānoñ ko is aag meñ jalne nahīñ dete

matlab pe jo aa jā.ūñ badal dete haiñ unvāñ

vo raaz mohabbat kā ugalne nahīñ dete

kahne kī hai āzādī magar baat ye sach hai

auroñ kī koī baat vo chalne nahīñ dete

daftar meñ bhī kuchh husn-e-butāñ hai mire aage

aafat se mirī jaan nikalne nahīñ dete

kuchh soch 'rahīm' ab to re.āyā hai ki raa.ī

vo kaun haiñ jo phūlne-phalne nahīñ dete

arman mere dil ke nikalne nahin dete

wo dal mere ishq ki galne nahin dete

har roz kiya karte hain wo ek naya wada

ushshaq ko hathon se nikalne nahin dete

raaton ko bhi ghaza se chamakta hai wo chehra

suraj wo kabhi husn ka Dhalne nahin dete

har roz wo har ahd se phir jate hain lekin

pahli ke mere wade ko Talne nahin dete

ruKHsar ke shoale hon ki honTon ki tapish ho

parwanon ko is aag mein jalne nahin dete

matlab pe jo aa jaun badal dete hain unwan

wo raaz mohabbat ka ugalne nahin dete

kahne ki hai aazadi magar baat ye sach hai

auron ki koi baat wo chalne nahin dete

daftar mein bhi kuchh husn-e-butan hai mere aage

aafat se meri jaan nikalne nahin dete

kuchh soch 'rahim' ab to reaya hai ki rai

wo kaun hain jo phulne-phalne nahin dete