sauda ye shairi ka hamare jo sar mein hai

saudā ye shā.irī kā hamāre jo sar meñ hai

hangāma mahfiloñ meñ hai iflās ghar meñ hai

bad-shakl hai za.iif hai dulhan to kyā huā

lākhoñ kī jā.edād bhī merī nazar meñ hai

añgrezī paḌh rahe haiñ amīroñ ke lāDle

urdu ġharīb sirf ġharīboñ ke ghar meñ hai

shādī kaheñ ise ki kaheñ umr-qaid ham

biivī hai india meñ to shauhar qatar meñ hai

murda batā ke zindoñ ko pahuñchāyā murda ghar

kitnā baḌā kamāl mire doctor meñ hai

fāqa-kashī se marte haiñ mar jaa.eñ ye avaam

shahroñ kī ḳhūb-sūratī merī nazar meñ hai

chande murīd de ke haiñ fōtpath par magar

dekho to V C R bhī murshid ke ghar meñ hai

mandāknī ke saath huuñ maiñ mahv-e-āshiqī

dekhā to merā ḳhvāb bhī Tiknī color meñ hai

ġhussa nikāltā hai jo amle pe ai 'rahīm'

afsar ajab nahīñ hai ki begam ke Dar meñ hai

sauda ye shairi ka hamare jo sar mein hai

hangama mahfilon mein hai iflas ghar mein hai

bad-shakl hai zaif hai dulhan to kya hua

lakhon ki jaedad bhi meri nazar mein hai

angrezi paDh rahe hain amiron ke laDle

urdu gharib sirf gharibon ke ghar mein hai

shadi kahen ise ki kahen umr-qaid hum

biwi hai india mein to shauhar qatar mein hai

murda bata ke zindon ko pahunchaya murda ghar

kitna baDa kamal mere doctor mein hai

faqa-kashi se marte hain mar jaen ye awam

shahron ki KHub-surati meri nazar mein hai

chande murid de ke hain footpath par magar

dekho to V C R bhi murshid ke ghar mein hai

mandakni ke sath hun main mahw-e-ashiqi

dekha to mera KHwab bhi Tikni color mein hai

ghussa nikalta hai jo amle pe ai 'rahim'

afsar ajab nahin hai ki begam ke Dar mein hai