tariq-e-girya ab is se behtar nahin milega

tarīq-e-girya ab is se behtar nahīñ milegā

ki ek aañsū bhī koī bāhar nahīñ milegā

ye shahr bhedoñ bharā yahāñ aadmī mileñge

magar kisī ke bhī dosh par sar nahīñ milegā

milegā daftar to chhūT jā.egā ghar kahīñ par

jo ghar malegā kahīñ to daftar nahīñ milegā

zamīñ pe pakkī imārateñ ug rahī haiñ aise

divāne sar phoḌne ko patthar nahīñ malegā

chhalaktī āñkhoñ harī-bharī muskurāhaToñ bin

mileñge dīvār-o-dar yahāñ ghar nahīñ milegā

milegī duniyā miloge tum sab mileñge lekin

hamārā vo gum-shuda muqaddar nahīñ milegā

tariq-e-girya ab is se behtar nahin milega

ki ek aansu bhi koi bahar nahin milega

ye shahr bhedon bhara yahan aadmi milenge

magar kisi ke bhi dosh par sar nahin milega

milega daftar to chhuT jaega ghar kahin par

jo ghar malega kahin to daftar nahin milega

zamin pe pakki imaraten ug rahi hain aise

diwane sar phoDne ko patthar nahin malega

chhalakti aankhon hari-bhari muskurahaTon bin

milenge diwar-o-dar yahan ghar nahin milega

milegi duniya miloge tum sab milenge lekin

hamara wo gum-shuda muqaddar nahin milega