yar ko humne ja-ba-ja dekha

yaar ko ham ne jā-ba-jā dekhā

kahīñ zāhir kahīñ chhupā dekhā

kahīñ mumkin huā kahīñ vājib

kahīñ faanī kahīñ baqā dekhā

diid apne kī thī use ḳhvāhish

aap ko har tarah banā dekhā

sūrat-e-gul meñ khil-khilā ke hañsā

shakl-e-bulbul meñ chahchahā dekhā

sham.a ho kar ke aur parvāna

aap ko aap meñ jalā dekhā

kar ke da.avā kahīñ anal-haq kā

bar-sar-e-dār vo khiñchā dekhā

thā vo bartar shumā-o-mā se niyāz

phir vahī ab shumā-o-mā dekhā

kahīñ hai bādshāh-e-taḳht-nashīñ

kahīñ kaasa liye gadā dekhā

kahīñ aabid banā kahīñ zāhid

kahīñ rindoñ kā peshvā dekhā

kahīñ vo dar-libās-e-ma.ashūqāñ

bar-sar-e-nāz aur adā dekhā

kahīñ āshiq 'niyāz' kī sūrat

sīna-biryāñ o dil-jalā dekhā

yar ko hum ne ja-ba-ja dekha

kahin zahir kahin chhupa dekha

kahin mumkin hua kahin wajib

kahin fani kahin baqa dekha

did apne ki thi use KHwahish

aap ko har tarah bana dekha

surat-e-gul mein khil-khila ke hansa

shakl-e-bulbul mein chahchaha dekha

shama ho kar ke aur parwana

aap ko aap mein jala dekha

kar ke dawa kahin anal-haq ka

bar-sar-e-dar wo khincha dekha

tha wo bartar shuma-o-ma se niyaz

phir wahi ab shuma-o-ma dekha

kahin hai baadshah-e-taKHt-nashin

kahin kasa liye gada dekha

kahin aabid bana kahin zahid

kahin rindon ka peshwa dekha

kahin wo dar-libas-e-mashuqan

bar-sar-e-naz aur ada dekha

kahin aashiq 'niyaz' ki surat

sina-biryan o dil-jala dekha