tere mizhgan hi na pahlu marte hain tere

tere mizhgāñ hī na pahlū mārte haiñ tere

ham-sarī rakhte haiñ abrū bhī dam-e-shamshīr se

dekh ye kartā hai ġham kī lazzateñ ham par harām

ho samajh kar āshnā ai naala Tuk tāsīr se

huuñ maiñ vo dīvāna-e-nāzuk-mizāj-e-gul-ruḳhāñ

kījiye zanjīr jis ko sāya-e-zanjīr se

soz-e-dil kyūñkar karūñ us shoḳh ke aage bayāñ

sham.a kī mānind jaltī hai zabāñ taqrīr se

garche hoñ 'bedār' ġharq-e-ma.asiyat sar-tā-ba-pā

pur-umīd-e-maġhfirat hai shabbar-o-shabbīr se

tere mizhgan hi na pahlu marte hain tere

ham-sari rakhte hain abru bhi dam-e-shamshir se

dekh ye karta hai gham ki lazzaten hum par haram

ho samajh kar aashna ai nala Tuk tasir se

hun main wo diwana-e-nazuk-mizaj-e-gul-ruKHan

kijiye zanjir jis ko saya-e-zanjir se

soz-e-dil kyunkar karun us shoKH ke aage bayan

shama ki manind jalti hai zaban taqrir se

garche hon 'bedar' gharq-e-masiyat sar-ta-ba-pa

pur-umid-e-maghfirat hai shabbar-o-shabbir se