teri nazron pe tasadduq aaj ahl-e-hosh hain

terī nazroñ pe tasadduq aaj ahl-e-hosh haiñ

jān-e-jāñ terī nigāheñ mai-kada-bar-dosh haiñ

ishq meñ ahl-e-vafā kitne aziyyat-kosh haiñ

ḳhuun dil kā ho rahā hai lab magar ḳhāmosh haiñ

ai nigāh-e-shauq kis manzil meñ le aa.ī mujhe

donoñ aalam jalva-gāh-e-yār meñ rū-posh haiñ

mujh ko tanhā dekhne vaale na samjheñ rāz-e-ishq

merī tanhā.ī ke lamhe yaar ke āġhosh haiñ

'sarmad'-o-'mansūr'-o-'shiblī' kī nazar se dekhiye

hosh vaale haiñ vahī duniyā meñ jo behosh haiñ

lan-tarānī kī sadā par muskurāyā thā koī

jitne zarre tuur meñ the aaj tak behosh haiñ

ai 'fanā' bāda-kashī meñ ye unhī kā hai karam

un kī mast āñkhoñ se pī kar bhī sarāpā hosh haiñ

teri nazron pe tasadduq aaj ahl-e-hosh hain

jaan-e-jaan teri nigahen mai-kada-bar-dosh hain

ishq mein ahl-e-wafa kitne aziyyat-kosh hain

KHun dil ka ho raha hai lab magar KHamosh hain

ai nigah-e-shauq kis manzil mein le aai mujhe

donon aalam jalwa-gah-e-yar mein ru-posh hain

mujh ko tanha dekhne wale na samjhen raaz-e-ishq

meri tanhai ke lamhe yar ke aaghosh hain

'sarmad'-o-'mansur'-o-'shibli' ki nazar se dekhiye

hosh wale hain wahi duniya mein jo behosh hain

lan-tarani ki sada par muskuraya tha koi

jitne zarre tur mein the aaj tak behosh hain

ai 'fana' baada-kashi mein ye unhi ka hai karam

un ki mast aankhon se pi kar bhi sarapa hosh hain