tha bahut be-dard lekin hausla deta raha

thā bahut be-dard lekin hausla detā rahā

vo mujhe har shab na.e ghar kā pata detā rahā

maiñ use DhūñDā kiyā jismoñ kī jannat meñ magar

vo mujhe ḳhvāboñ meñ milne kī sazā detā rahā

kab use rukne kī fursat thī ġhurūr-e-husn meñ

maiñ ta.āqub meñ ravāñ thā maiñ sadā detā rahā

jal rahā thā ḳhud hī be-mā.egī kī aag meñ

maiñ isī dāman se sho.aloñ ko havā detā rahā

garche mohlik thā magar insāf kī ummīd par

muddatoñ ik zaḳhm qātil ko sadā detā rahā

maiñ to is kī justujū meñ thā guzar aayā magar

dasht-e-māzī der tak bū-e-vafā detā rahā

sab se pīchhe rah gayā huuñ 'arsh' yuuñ is dasht meñ

maiñ safar meñ har kisī ko rāsta detā rahā

tha bahut be-dard lekin hausla deta raha

wo mujhe har shab nae ghar ka pata deta raha

main use DhunDa kiya jismon ki jannat mein magar

wo mujhe KHwabon mein milne ki saza deta raha

kab use rukne ki fursat thi ghurur-e-husn mein

main taaqub mein rawan tha main sada deta raha

jal raha tha KHud hi be-maegi ki aag mein

main isi daman se shoalon ko hawa deta raha

garche mohlik tha magar insaf ki ummid par

muddaton ek zaKHm qatil ko sada deta raha

main to is ki justuju mein tha guzar aaya magar

dasht-e-mazi der tak bu-e-wafa deta raha

sab se pichhe rah gaya hun 'arsh' yun is dasht mein

main safar mein har kisi ko rasta deta raha