tha bahut shor yahan ek zamane mein mera

thā bahut shor yahāñ ek zamāne meñ mirā

ab koī aks nahīñ ā.ina-ḳhāne meñ mirā

raah se aañkh milāne kā hunar jaan gayā

vaqt to sarf huā ḳhaak uḌāne meñ mirā

apnī yakjā.ī se tanhā.ī se puurā na huā

jitnā nuqsān huā shahr basāne meñ mirā

jāntā huuñ ki use merī zarūrat hī nahīñ

varna kyā jaatā bhalā lauT ke aane meñ mirā

daad kyā kyā na harīfoñ se mujhe miltī rahī

haañ magar jī na lagā sher sunāne meñ mirā

koī ta.azīr ki maiñ ne bhī mohabbat kī hai

kuchh to hissa hai ye tahrīk chalāne meñ mirā

apne kirdār se insāf kiyā hai maiñ ne

aur kirdār nahīñ koī fasāne meñ mirā

tha bahut shor yahan ek zamane mein mera

ab koi aks nahin aaina-KHane mein mera

rah se aankh milane ka hunar jaan gaya

waqt to sarf hua KHak uDane mein mera

apni yakjai se tanhai se pura na hua

jitna nuqsan hua shahr basane mein mera

jaanta hun ki use meri zarurat hi nahin

warna kya jata bhala lauT ke aane mein mera

dad kya kya na harifon se mujhe milti rahi

han magar ji na laga sher sunane mein mera

koi tazir ki main ne bhi mohabbat ki hai

kuchh to hissa hai ye tahrik chalane mein mera

apne kirdar se insaf kiya hai main ne

aur kirdar nahin koi fasane mein mera