the kabhi hum bhi haqiqat ab fasana ho gae

the kabhī ham bhī haqīqat ab fasāna ho ga.e

aa ke is duniyā meñ ham misl-e-zamāna ho ga.e

aap hī māñgī madad imdād ko aa.e bhī ḳhud

aap hī ham sar hue aur aap shāna ho ga.e

log jitne shahr meñ the bandagī ke pāsbāñ

ham se mil kar rāt-bhar meñ sūfiyāna ho ga.e

rāt-rānī se mohabbat thī hameñ kuchh is qadar

raat ko khilne lage aur rāt-rānā ho ga.e

charḳh par uḌte hue samjhī zamīñ kī ahmiyat

pañkh jab aa.e to ham bhī tā.irāna ho ga.e

shahr ke sab dushmanoñ par qahr TuuTā vaqt kā

muflisī meñ sab ke rishte dostāna ho ga.e

tiir koī aa ke lagnā thā hamārī piiTh meñ

ham ko honā thā nishāna ham nishāna ho ga.e

rāt-din kā suut kaatā hai dukhoñ kī raa.ī se

bante bante zindagī ham kār-ḳhāna ho ga.e

diin sab kā hī mohabbat be-niyāzī dil meñ hai

shahr ke bāshinde saare rāhulānā ho ga.e

the kabhi hum bhi haqiqat ab fasana ho gae

aa ke is duniya mein hum misl-e-zamana ho gae

aap hi mangi madad imdad ko aae bhi KHud

aap hi hum sar hue aur aap shana ho gae

log jitne shahr mein the bandagi ke pasban

hum se mil kar raat-bhar mein sufiyana ho gae

raat-rani se mohabbat thi hamein kuchh is qadar

raat ko khilne lage aur raat-rana ho gae

charKH par uDte hue samjhi zamin ki ahmiyat

pankh jab aae to hum bhi tairana ho gae

shahr ke sab dushmanon par qahr TuTa waqt ka

muflisi mein sab ke rishte dostana ho gae

tir koi aa ke lagna tha hamari piTh mein

hum ko hona tha nishana hum nishana ho gae

raat-din ka sut kata hai dukhon ki rai se

bante bante zindagi hum kar-KHana ho gae

din sab ka hi mohabbat be-niyazi dil mein hai

shahr ke bashinde sare rahulana ho gae