thi apne aap mein aatish-fishan hawa koi

thī apne aap meñ ātish-fishāñ havā koī

lagī thī aag kisī ko makāñ jalā koī

chale jo thaam ke kāñdhe vo fā.ede meñ rahe

kisī ne khaa.ī bhī Thokar agar girā koī

ye bāġhbāñ ke hunar kā kamāl thā shāyad

kisī kā biij lagāyā shajar ugā koī

tamām jism barahna lage the jab niklā

pahan ke besh-bahā ḳhushnumā qabā koī

ab is se baḌh ke bhī me.ār-e-adl kyā hogā

kisī ke jurm kī paane lagā sazā koī

nahīñ hai naġhma-e-hastī to sāz-e-marg sahī

miyān-e-shahr-e-ḳhamoshāñ uThe sadā koī

banā hai merī tamāzat se aab abr magar

mire hī khet pe barsī nahīñ ghaTā koī

unhīñ ke jism pe 'āsim' the be-shumār nishāñ

qabā pe jin kī na thā dāġh-e-bad-numā koī

thi apne aap mein aatish-fishan hawa koi

lagi thi aag kisi ko makan jala koi

chale jo tham ke kandhe wo faede mein rahe

kisi ne khai bhi Thokar agar gira koi

ye baghban ke hunar ka kamal tha shayad

kisi ka bij lagaya shajar uga koi

tamam jism barahna lage the jab nikla

pahan ke besh-baha KHushnuma qaba koi

ab is se baDh ke bhi mear-e-adl kya hoga

kisi ke jurm ki pane laga saza koi

nahin hai naghma-e-hasti to saz-e-marg sahi

miyan-e-shahr-e-KHamoshan uThe sada koi

bana hai meri tamazat se aab abr magar

mere hi khet pe barsi nahin ghaTa koi

unhin ke jism pe 'asim' the be-shumar nishan

qaba pe jin ki na tha dagh-e-bad-numa koi