thoDa sa zindagi ka KHasara zarur hai

thoḌā sā zindagī kā ḳhasāra zarūr hai

par ġham ne dil kā rañg nikhārā zarūr hai

mahtāb phir rahā hai ḳhalāoñ meñ is tarah

jaise ki āsmāñ kā kināra zarūr hai

aalam meñ dekhiye to koī bhī ḳhudā nahīñ

aalam ḳhudā kī samt ishāra zarūr hai

ham ko yaqīñ hai aap ko dil kī kitāb meñ

ik an-likhe sā naam hamārā zarūr hai

kyā jāniye vo shoḳh samundar hai yā sarāb

jo bhī ho tishnagī kā sahārā zarūr hai

vaise mirī zabāñ pe koī aur lafz thā

par dost kah ke tujh ko pukārā zarūr hai

kuchh sher kah ke ham ko gumāñ ye huā 'mayañk'

ik āsmāñ zamīñ pe utārā zarūr hai

thoDa sa zindagi ka KHasara zarur hai

par gham ne dil ka rang nikhaara zarur hai

mahtab phir raha hai KHalaon mein is tarah

jaise ki aasman ka kinara zarur hai

aalam mein dekhiye to koi bhi KHuda nahin

aalam KHuda ki samt ishaara zarur hai

hum ko yaqin hai aap ko dil ki kitab mein

ek an-likhe sa nam hamara zarur hai

kya jaaniye wo shoKH samundar hai ya sarab

jo bhi ho tishnagi ka sahaara zarur hai

waise meri zaban pe koi aur lafz tha

par dost kah ke tujh ko pukara zarur hai

kuchh sher kah ke hum ko guman ye hua 'mayank'

ek aasman zamin pe utara zarur hai