tere sawal ka tanha jawab main hi tha

tire savāl kā tanhā javāb maiñ hī thā

nigāh-e-nāz tirā intiḳhāb maiñ hī thā

mire hī ḳhuun se zehnoñ kī barf pighlī hai

lahūluhān pas-e-inqalāb maiñ hī thā

ye aur baat ki ab tū mujhe na pahchāne

guzishta shab tirī āñkhoñ kā ḳhvāb maiñ hī thā

mire sivā bhī ka.ī aur moḌ the lekin

tire fasāne kā lubb-e-lubāb maiñ hī thā

mire vajūd se raushan thiiñ hasrateñ terī

tire falak kā kabhī āftāb maiñ hī thā

ye merī ḳhāna-badoshī mirā nasīb na thī

ḳhud apnī zaat kī ḳhātir azaab maiñ hī thā

sabhī ke jism pe achchhā.ī kī thī muhr 'shakīl'

is anjuman meñ akelā ḳharāb maiñ hī thā

tere sawal ka tanha jawab main hi tha

nigah-e-naz tera intiKHab main hi tha

mere hi KHun se zehnon ki barf pighli hai

lahuluhan pas-e-inqalab main hi tha

ye aur baat ki ab tu mujhe na pahchane

guzishta shab teri aankhon ka KHwab main hi tha

mere siwa bhi kai aur moD the lekin

tere fasane ka lubb-e-lubab main hi tha

mere wajud se raushan thin hasraten teri

tere falak ka kabhi aaftab main hi tha

ye meri KHana-badoshi mera nasib na thi

KHud apni zat ki KHatir azab main hi tha

sabhi ke jism pe achchhai ki thi muhr 'shakil'

is anjuman mein akela KHarab main hi tha