ترے یقین پہ ہم نے یقین یار کیا

ترے یقین پہ ہم نے یقین یار کیا

نہ ہو رہا تھا ہمیں پھر بھی بار بار کیا

نمی وہ آنکھ میں روشن ہوئی ہے مدت بعد

نمی کہ جس کا ازل سے ہے انتظار کیا

دلاسا دے کے نہ لغزش کو تو گناہ بنا

مجھے ذرا بھی ندامت نہیں کہ پیار کیا

زمیں رہی نہ رہا آسماں بھروسے کا

خدا کی ذات پہ جس دن سے اعتبار کیا

خرد تو عشق کو خاطر میں ہی نہیں لاتا

قرار دل کو دیا دل ہی بے قرار کیا

چلے ہیں سلسلے جب سے تجھے منانے کے

ہمیں ہماری انا نے ہی شرمسار کیا

ترا وہ راز نہاں آج بھی نہاں ہی ہے

یہ بات اور کہ تو نے تو آشکار کیا

ملے کوئی بھی ہنسی رہتی ہے لبوں پہ مرے

عجیب لہجہ اداسی نے اختیار کیا