teri hawas mein jo dil se puchha nikal ke ghar se kidhar ko chaliye

tirī havas meñ jo dil se pūchhā nikal ke ghar se kidhar ko chaliye

taḌap ke bolā jidhar vo nikle shitāb usī rahguzar ko chaliye

na chāhiye kuchh adam ko le kar nikaliye hastī se jaan de kar

safar jo liije rah-e-ḳhudā meñ luTā ke zād-e-safar ko chaliye

azal se us kā hī aasrā hai jo dene vaalā murādoñ kā hai

barā.e-fil-faur umīd-e-dil ko jo chūmne us ke dar ko chaliye

idhar to taqdīr so rahī hai udhar vo nābūd ho rahī hai

visāl kī shab ko ro jo chukiye to rone sham-e-sahar ko chaliye

jo haath ik phuul ko lagā.eñ yaqīñ hai kāñToñ meñ khīñche jaa.eñ

hamāre haq meñ vo hove hanzal jo nosh karne samar ko chaliye

ajiib mushkil hai aah ai dil kaThin hai bīm-o-rajā kī manzil

qadam qadam par ye sochte haiñ kidhar na chaliye kidhar ko chaliye

tirī judā.ī meñ jān-e-ālam kiyā hai donoñ ko ġham ne be-dam

banā.iye jā ke dil kī turbat ki dafn karne jigar ko chaliye

huā hai vo shauq-e-dīd-bāzī ki samjheñ is ko bhī sarfarāzī

bulā.eñ āñkheñ vo phoḌne ko to nazr karne nazar ko chaliye

visāl kī shab guzar ga.ī hai jo aarzū thī vo mar ga.ī hai

hameñ to hichkī lagī huī hai vo fikr meñ haiñ ki ghar ko chaliye

ye qaaf se qaaf tak hai shohrat kareñge vo imtihān-e-vahshat

junūñ kā aalam ye kah rahā hai yahīñ se Takrāte sar ko chaliye

jo sub.h-e-pīrī huī huvaidā sadā adam se huī ye paidā

namāz paḌh ke na ab Thahariye savere kasiye kamar ko chaliye

luTā hai gulshan meñ āshiyāna kahīñ hamārā nahīñ Thikānā

qafas se chhuT kar bhaḌak rahe haiñ ki tinke chunane kidhar ko chaliye

kamī na dard-e-jigar meñ hogī ye ham se aisī ne guftugū kī

davā ko phir DhūñDiyegā pahle talāsh karne asar ko chaliye

hamesha har saañs ne hamārī shab-e-judā.ī meñ aarzū kī

kisī tarah se tire chaman meñ nasīm ho kar sahar ko chaliye

charāġh-e-bazm-e-ḳhudā huā hai ḳhudā ne mahbūb use kahā hai

ye shaam se lau lagī hai dil ko ki dekhne us bashar ko chaliye

hamārā aañsū vo be-bahā hai nigāh-e-hasrat meñ jach rahā hai

mañgā ke ab us pe chaurahe meñ nisār karne guhar ko chaliye

sū-e-falak kiije rū-e-tābāñ ki chaudhvīñ shab pe hai ye nāzāñ

dikhā ke husn-e-shabāb apnā chakor karne qamar ko chaliye

kisī tarah se na hone paa.e hamāre nāloñ kā faash parda

agarche shor-e-fuġhāñ kā apne sharīk karne gajar ko chaliye

'sharaf' jo ham un pe jaan deñge ḳhabar hamārī lahad meñ leñge

hilā ke shāna jalā ke ham ko kaheñge uThiye bhī ghar ko chaliye

teri hawas mein jo dil se puchha nikal ke ghar se kidhar ko chaliye

taDap ke bola jidhar wo nikle shitab usi rahguzar ko chaliye

na chahiye kuchh adam ko le kar nikaliye hasti se jaan de kar

safar jo lije rah-e-KHuda mein luTa ke zad-e-safar ko chaliye

azal se us ka hi aasra hai jo dene wala muradon ka hai

barae-fil-faur umid-e-dil ko jo chumne us ke dar ko chaliye

idhar to taqdir so rahi hai udhar wo nabud ho rahi hai

visal ki shab ko ro jo chukiye to rone sham-e-sahar ko chaliye

jo hath ek phul ko lagaen yaqin hai kanTon mein khinche jaen

hamare haq mein wo howe hanzal jo nosh karne samar ko chaliye

ajib mushkil hai aah ai dil kaThin hai bim-o-raja ki manzil

qadam qadam par ye sochte hain kidhar na chaliye kidhar ko chaliye

teri judai mein jaan-e-alam kiya hai donon ko gham ne be-dam

banaiye ja ke dil ki turbat ki dafn karne jigar ko chaliye

hua hai wo shauq-e-did-bazi ki samjhen is ko bhi sarfaraazi

bulaen aankhen wo phoDne ko to nazr karne nazar ko chaliye

visal ki shab guzar gai hai jo aarzu thi wo mar gai hai

hamein to hichki lagi hui hai wo fikr mein hain ki ghar ko chaliye

ye qaf se qaf tak hai shohrat karenge wo imtihan-e-wahshat

junun ka aalam ye kah raha hai yahin se Takraate sar ko chaliye

jo subh-e-piri hui huwaida sada adam se hui ye paida

namaz paDh ke na ab Thahariye sawere kasiye kamar ko chaliye

luTa hai gulshan mein aashiyana kahin hamara nahin Thikana

qafas se chhuT kar bhaDak rahe hain ki tinke chunane kidhar ko chaliye

kami na dard-e-jigar mein hogi ye hum se aisi ne guftugu ki

dawa ko phir DhunDiyega pahle talash karne asar ko chaliye

hamesha har sans ne hamari shab-e-judai mein aarzu ki

kisi tarah se tere chaman mein nasim ho kar sahar ko chaliye

charagh-e-bazm-e-KHuda hua hai KHuda ne mahbub use kaha hai

ye sham se lau lagi hai dil ko ki dekhne us bashar ko chaliye

hamara aansu wo be-baha hai nigah-e-hasrat mein jach raha hai

manga ke ab us pe chaurahe mein nisar karne guhar ko chaliye

su-e-falak kije ru-e-taban ki chaudhwin shab pe hai ye nazan

dikha ke husn-e-shabab apna chakor karne qamar ko chaliye

kisi tarah se na hone pae hamare nalon ka fash parda

agarche shor-e-fughan ka apne sharik karne gajar ko chaliye

'sharaf' jo hum un pe jaan denge KHabar hamari lahad mein lenge

hila ke shana jala ke hum ko kahenge uThiye bhi ghar ko chaliye