teri nigah se ise bhi guman hua ki main hun

tirī nigah se ise bhī gumāñ huā ki maiñ huuñ

vagarna dil to mirā māntā na thā ki maiñ huuñ

ajiib lamha vo dīdār-e-husn-e-yār kā thā

us ek pal kī tajallī meñ ye khulā ki maiñ huuñ

na jaane be-ḳhabarī ke vo kis maqām pe thā

nazar uThātā to har gul pukārtā ki maiñ huuñ

tire jamāl kī kuchh raushnī sī paḌtī hai

batā rahā hai mujhe rañg-e-ā.ina ki maiñ huuñ

jise bhulā ke ye dil mutma.in thā muddat se

kal us ke zikr pe ik ahd bol uThā ki maiñ huuñ

par-e-zamāna to parvāz-e-nūr se bhī hai tez

kahāñ hai kaun thā jis ne abhī kahā ki maiñ huuñ

kahāñ pe sarhad-e-nā-būd-o-būd miltī hai

subūt ho ki na ho e'tibār kyā ki maiñ huuñ

hayāt ḳhud hai dahān-e-nahañg-e-lā-ya.anī

jo hai adam kā musāfir hai maiñ chalā ki maiñ huuñ

na raftagāñ haiñ na ab yād-e-raftagāñ baaqī

maiñ kyā huuñ juz ram-e-yak-mauja-e-fanā ki maiñ huuñ

mujh aise zarroñ kā honā na honā ek sā hai

bagūle in se uThe to pata chalā ki maiñ huuñ

khulā paḌā hai sar-e-rāh be-his-o-harakat

jo haath kal tak uThā chīḳhtā rahā ki maiñ huuñ

abhī tarīq-e-tahammul nahīñ mizājoñ meñ

abhī faqīhoñ meñ hañgāma hai bapā ki maiñ huuñ

kahīñ kahīñ abhī tauqīr-e-lafz baaqī hai

suḳhan sunā.ī diyā harf-e-dard kā ki maiñ huuñ

ajiib ālam-e-hū thā 'ziyā' jab āḳhir-e-shab

kisī ko dil ne ye kahte hue sunā ki maiñ huuñ

teri nigah se ise bhi guman hua ki main hun

wagarna dil to mera manta na tha ki main hun

ajib lamha wo didar-e-husn-e-yar ka tha

us ek pal ki tajalli mein ye khula ki main hun

na jaane be-KHabari ke wo kis maqam pe tha

nazar uThata to har gul pukarta ki main hun

tere jamal ki kuchh raushni si paDti hai

bata raha hai mujhe rang-e-aina ki main hun

jise bhula ke ye dil mutmain tha muddat se

kal us ke zikr pe ek ahd bol uTha ki main hun

par-e-zamana to parwaz-e-nur se bhi hai tez

kahan hai kaun tha jis ne abhi kaha ki main hun

kahan pe sarhad-e-na-bud-o-bud milti hai

subut ho ki na ho e'tibar kya ki main hun

hayat KHud hai dahan-e-nahang-e-la-yani

jo hai adam ka musafir hai main chala ki main hun

na raftagan hain na ab yaad-e-raftagan baqi

main kya hun juz ram-e-yak-mauja-e-fana ki main hun

mujh aise zarron ka hona na hona ek sa hai

bagule in se uThe to pata chala ki main hun

khula paDa hai sar-e-rah be-his-o-harakat

jo hath kal tak uTha chiKHta raha ki main hun

abhi tariq-e-tahammul nahin mizajon mein

abhi faqihon mein hangama hai bapa ki main hun

kahin kahin abhi tauqir-e-lafz baqi hai

suKHan sunai diya harf-e-dard ka ki main hun

ajib aalam-e-hu tha 'ziya' jab aaKHir-e-shab

kisi ko dil ne ye kahte hue suna ki main hun