tujhe pasand jo dil ki lagan nahin aai

tujhe pasand jo dil kī lagan nahīñ aa.ī

mujhe bhī raas tirī anjuman nahīñ aa.ī

uḌā sā rañg hai kyuuñ vaqt ke mashīhāo

abhī to manzil-e-dār-o-rasan nahīñ aa.ī

taḌaptā hī rahā yāqūb dār-e-ahd-e-kuhan

havā-e-yūsuf-e-gul-pairahan nahīñ aa.ī

sitam-shi.ār to thā ġhair bhī magar us ko

jafā-tarāzī-e-ahl-e-vatan nahīñ aa.ī

jo dhuup ban ke chamak jaatī dil ke āñgan meñ

tirī nazar kī vo rañgīñ kiran nahīñ aa.ī

jo pesh-ḳhema bane inqalāb kā ab tak

jabīn-e-vaqt pe aisī shikan nahīñ aa.ī

tujhe pasand jo dil ki lagan nahin aai

mujhe bhi ras teri anjuman nahin aai

uDa sa rang hai kyun waqt ke mashihao

abhi to manzil-e-dar-o-rasan nahin aai

taDapta hi raha yaqub dar-e-ahd-e-kuhan

hawa-e-yusuf-e-gul-pairahan nahin aai

sitam-shiar to tha ghair bhi magar us ko

jafa-taraazi-e-ahl-e-watan nahin aai

jo dhup ban ke chamak jati dil ke aangan mein

teri nazar ki wo rangin kiran nahin aai

jo pesh-KHema bane inqalab ka ab tak

jabin-e-waqt pe aisi shikan nahin aai