Tuk honT hilaun to ye kahta hai na bak be

Tuk hoñT hilā.ūñ to ye kahtā hai na bak be

aur paas jo baiThūñ to sunātā hai sarak be

kahtā huuñ kabhī ghar meñ mire aa to hai kahtā

chaukhaT pe hamārī koī din sar to paTak be

jab badr nikaltā hai to kahtā hai vo maġhrūr

kah do use yaañ aan ke itnā na chamak be

parda jo ulaT dūñgā abhī muñh se to dam meñ

uḌ jā.egī chehre kī tire sab ye jhamak be

sab bāñkpan ab terā 'nazīr' ishq ne khoyā

kyā ho ga.ī sach kah vo terī duut dubak be

Tuk honT hilaun to ye kahta hai na bak be

aur pas jo baiThun to sunata hai sarak be

kahta hun kabhi ghar mein mere aa to hai kahta

chaukhaT pe hamari koi din sar to paTak be

jab badr nikalta hai to kahta hai wo maghrur

kah do use yan aan ke itna na chamak be

parda jo ulaT dunga abhi munh se to dam mein

uD jaegi chehre ki tere sab ye jhamak be

sab bankpan ab tera 'nazir' ishq ne khoya

kya ho gai sach kah wo teri dut dubak be