tum kuchh bhi karo hosh mein aane ke nahin hum

tum kuchh bhī karo hosh meñ aane ke nahīñ ham

haiñ ishq gharāne ke zamāne ke nahīñ ham

ham aur mohabbat ke sivā kuchh nahīñ karte

vo ruuTh gayā hai to manāne ke nahīñ ham

dariyā hai mohabbat to mile jism kā maidān

ik jism pyāle meñ samāne ke nahīñ ham

ham par bhī kabhī apnī halākat kī nazar Daal

sach jaan ki jaan apnī bachāne ke nahīñ ham

kitnā hī kare shor yahāñ aa ke zamāna

tujh par se magar dhyān haTāne ke nahīñ ham

ye jism faqat ek taraf kā hai musāfir

jā kar phir usī jism meñ aane ke nahīñ ham

paas aao ki ham khā to nahīñ jā.eñge tum ko

bas daañt dikhāne ke haiñ khāne ke nahīñ ham

'ehsās'-miyāñ piir haiñ murshid haiñ hamāre

ab uTh ke yahāñ se kahīñ jaane ke nahīñ ham

tum kuchh bhi karo hosh mein aane ke nahin hum

hain ishq gharane ke zamane ke nahin hum

hum aur mohabbat ke siwa kuchh nahin karte

wo ruTh gaya hai to manane ke nahin hum

dariya hai mohabbat to mile jism ka maidan

ek jism pyale mein samane ke nahin hum

hum par bhi kabhi apni halakat ki nazar Dal

sach jaan ki jaan apni bachane ke nahin hum

kitna hi kare shor yahan aa ke zamana

tujh par se magar dhyan haTane ke nahin hum

ye jism faqat ek taraf ka hai musafir

ja kar phir usi jism mein aane ke nahin hum

pas aao ki hum kha to nahin jaenge tum ko

bas dant dikhane ke hain khane ke nahin hum

'ehsas'-miyan pir hain murshid hain hamare

ab uTh ke yahan se kahin jaane ke nahin hum